Министерот за надворешни работи и надворешна трговија Тимчо Муцунски денеска и утре е во работна посета на Брисел, каде ќе оствари повеќе значајни средби за евроинтегративниот процес на државата.

Во фокусот на посетата се средбите со еврокомесарката за проширување Марта Кос и извршната потпретседателка Роксана Минцату, задолжена за социјални права и вработување.

Од ресорното министерство информираат дека во центарот на разговорите ќе бидат евроинтегративниот процес, натамошната динамика на пристапниот процес, како и секторската соработка со институциите на ЕУ.

Муцунски исто така ќе учествува на тркалезна маса под наслов „Патот кон европско проширување”, организирана од организацијата „Пријатели на Европа”. Планирани се и средби со претставници на Европскиот парламент и брифинг со претставници на земјите-членки во Советот на ЕУ за прашањата на проширувањето.

Министерот е придружуван од министерот за земјоделство Цветан Трипуновски, кој е закажан за средба со генералниот директор за земјоделство на Европската комисија, Елизабет Верније.