Скопското Основно јавно обвинителство поднесе обвинителен акт против три лица кои како соизвршители на почетокот на март украле кабли од кругот на фабриката “Железара” во Скопје.

Трите лица се товарат за кривичното дело тешка кражба, според член 236 став 4 во врска со став 1 од Кривичниот законик.

Кражбата се случила во првите денови од март, кога обвинетите од кругот на “Железара” украле различни видови кабли, сопственост на фирма од Кавадарци, со вкупна вредност од 196.500 денари (околу 3.200 евра).

При кражбата тие оштетиле и кабел кој бил дел од јавна електрична инсталација, вреден 800.000 денари (околу 13.000 евра).

Обвинетите биле откриени и лишени од слобода кога ги натовариле каблите во автомобил и се обиделе да ги изнесат од кругот на фабриката. За еден од обвинетите е побарано продолжување на мерката притвор, додека за останатите двајца на сила се мерки за претпазливост.

Ова не е прво обвинение за кражба на кабли од кругот на “Железара”.