Загреб ќе стане првиот европски град со комерцијална услуга за автономни такси-возила, благодарение на стратешко партнерство меѓу Убер, хрватската компанија Верне и кинескиот технолошки гигант Пони.еј.

Трите компании соработуваат на систем за автономна мобилност кој ја комбинира технологијата за самовозење на Пони.еј, платформата на Убер и оперативното искуство на Верне. Верне ќе управува со флотата и операциите, Пони.еј ја обезбедува технологијата за автономно возење, а Убер го интегрира сервисот во својата апликација.

Тестирањата веќе започнаа на загрепските улици користејќи го системот за автономно возење Ген-7 на Пони.еј. Компаниите планираат да изградат скалабилен систем за проширување на повеќе пазари, со флота од илјадници автономни возила во наредните години.

„Европа има потреба од автономна мобилност која може да премине од тестирање во вистинска комерцијална услуга”, изјави извршниот директор на Верне, Марко Пејковиќ. Убер најави инвестиција во Верне како стратешки партнер за поддршка на развојот.