Американскиот претседател Доналд Трамп изјави дека сака да ја „земе нафтата на Иран” и сугерираше дека американските сили би можеле да го заземат островот Харг, центарот на иранскиот извоз на нафта.

„Искрено, највеќе би сакал да ја земам нафтата на Иран, но некои глупави луѓе во САД велат: зошто го правиш ова? Но тоа се глупави луѓе”, изјави Трамп во интервју за Фајненшл Тајмс.

Трамп сигнализираше дека заземањето на островот е можна опција. „Можеби ќе го заземеме Харг, а можеби нема. Имаме многу опции”, рече тој, додавајќи дека тоа би подразбирало долготрајно американско воено присуство.

Кога беше прашан за иранските одбранбени сили на островот, Трамп изрази уверување дека „тие немаат никаква одбрана”. „Би можеле многу лесно да го заземеме”, објави претседателот.

Островот Харг се наоѓа околу 500 километри северозападно од Ормускиот Пролив и го сместува најголемиот нафтен терминал на Иран, преку кој Техеран извезува околу 90 отсто од својата нафта. Во средината на март, американските сили спроведоа голема операција на Харг, гаѓајќи над 90 ирански воени цели.