Државниот врв на Македонија упати честитки до христијанските верници кои денеска го слават Велигден според римокатоличката традиција.

Претседателката Гордана Сиљановска-Давкова нагласи дека Христовото воскресение веќе две илјади години им дава надеж на верниците, изразувајќи верување дека Велигден „ќе донесе мир, духовност и мудрост” среде глобалните предизвици.

Премиерот Христијан Мицкоски повика на единство: „Преку толеранција, заедништво, солидарност, хуманост и меѓусебна почит можеме максимално да придонесеме за подобра и поправедна држава”.

Претседателот на Собранието Африм Гаши им порача на верниците дека празникот треба да ја зајакне довербата и солидарноста меѓу граѓаните.

Централната велигденска литургија се одржа во католичката црква „Пресвето Срце Исусово” во Скопје, предводена од бискупот Кирил Стојанов, кој во својата проповед ги спомена конфликтите во Украина и Блискиот Исток, повикувајќи на мир и дијалог.