Украинското Министерство за надворешни работи категорично ги отфрли обвинувањата за вмешаност во обидот за саботажа на гасоводот „Турски тек” кај Канижа во северна Србија.

„Ги отфрламе обидите лажно да се поврзе Украина со инцидентот со експлозив пронајден во близина на гасоводот во Србија. Украина нема никаква врска со ова“, изјави портпаролот на украинската дипломатија Георги Тихи на платформата X.

Тихи сугерираше дека инцидентот најверојатно претставува руска операција под лажно знаме, опишувајќи го како дел од мешањето на Москва во унгарските избори.

Реакцијата дојде откако српските безбедносни власти открија експлозивни материјали во близина на гасната инфраструктура која ги поврзува Србија и Унгарија. Експлозивот бил херметички затворен и специјално спакуван за транспорт, придружен со детонатори и опрема за подготовка.

Српски воени претставници претходно се осврнаа на дезинформациите околу случајот, појаснувајќи дека потеклото на производителот не укажува на одговорност за нарачување или извршување на операцијата.