Цртеж може да биде поопасен од говор – особено ако исмејува погрешен човек. Рускиот уметник и карикатурист Роберт Кузовков, познат под името Семјон Скрепетски, кој со години го исмејуваше Владимир Путин, беше убиен во Полска. Полскиот премиер Доналд Туск вели дека убиството има „обележја на политички атентат”.

Сценариото е студено и прецизно. Во понеделникот, во градот Бјала Подласка во источна Полска, непознат маж му пришол близу неговиот дом околу 9:45 наутро, испукал два, па уште три истрели од непосредна близина – во главата, градите и грбот. Починал на самото место. Полските власти првично приведоа двајца белоруски државјани, но ги пуштија поради недостиг на докази.

Туск беше недвосмислен: „Ако Русија го нарачала ова убиство, тоа претставува исклучително сериозно меѓународно прашање. Тоа би било државен тероризам.” Според него, на Кузовков му била понудена заштита, која тој ја одбил. Само неколку дена претходно, на 12 јуни, уметникот објавил видео во кое го фрла руското знаме во Берлин на рускиот државен празник.

Тука има нешто што нè засега сите. Кога една држава нарачува убиство на човек чиешто единствено „оружје” биле моливот и иронијата, пораката не е упатена само до жртвата – туку до секого што се осмелува да се потсмева на власта. Балканот предобро знае што значи кога критиката станува смртоносна професија. Прашањето не е дали еден цртеж вреди живот – туку каков е тоа режим што се плаши од цртеж толку многу што испраќа човек со пиштол.