Од 10 април започнува целосната имплементација на европскиот систем за влез-излез (EES), со што на надворешните граници на Европската унија се воведува нов, дигитализиран начин на евиденција и контрола на државјани кои патуваат за краткорочен престој.

Со воведувањето на системот, влезовите и излезите ќе се евидентираат електронски, а ќе се обработуваат и основни биометриски податоци – отпечатоци од прсти и фотографија – за побрза идентификација и следење на дозволениот престој согласно правилото „90 дена во период од 180 дена”.

Министерството за внатрешни работи соопшти дека граничната полиција ги презела сите неопходни мерки и активности за обезбедување брз и беспречен промет на патници на граничните премини.

Системот се однесува на државјани од земји кои не се членки на ЕУ, вклучително и Македонија. Се очекува времето на задржување на граничните премини за влез во ЕУ да се зголеми, но полицијата ветува зголемена ангажираност за одржување проточност.