Одборот за мир на претседателот Трамп за Газа доби само мал дел од ветените 17 милијарди долари, што го спречува американскиот претседател да продолжи со спроведување на планот за иднината на опустошената палестинска територија, според извори.

Десет дена пред американско-израелските напади на Иран кои го втурнаа регионот во војна, Трамп беше домаќин на конференција во Вашингтон каде арапските заливски држави ветија милијарди за управување и реконструкција на Газа по две години израелско разорување.

Од десетте земји кои ветија средства, само три – Обединетите Арапски Емирати, Мароко и самите САД – навистина префрлија пари. Досега е собрано помалку од 1 милијарда долари. Војната со Иран „влијаеше на се”, влошувајќи ги претходните финансиски тешкотии.

Одборот за мир ги негираше финансиските проблеми, тврдејќи дека „нема финансиски ограничувања” и дека сите барања за финансирање биле исполнети „веднаш и целосно”.

Националниот комитет за управување со Газа (НКУГ), група палестински технократи поддржана од САД која треба да ја преземе контролата врз Газа од Хамас, не може да влезе во Газа поради финансиски и безбедносни проблеми. Според палестински функционер, одборот ги известил палестинските фракции дека „моментално нема достапни пари”.

Хамас повеќе пати изјави подготвеност за предавање на управувањето на НКУГ. Реконструкцијата на Газа, каде четири петтини од зградите се уништени за време на двегодишното израелско бомбардирање, е проценета од глобални институции на приближно 70 милијарди долари.