Startapi për fuzion Helion, i mbështetur nga Sem Altman, mblodhi edhe 465 milionë dollarë me një vlerësim prej 15,5 miliardësh. Paratë vijnë ndërsa kompania vrapon ta përfundojë Orion, centralin e saj të parë, me premtimin për të dorëzuar rrymë fuzioni në rrjet që në vitin 2028 - sipas marrëveshjes me Microsoft. Me këtë raund, financimi i përgjithshëm arriti 1,5 miliardë dollarë.

Helion ndjek një rrugë tjetër nga konkurrenca. Ndërsa disa përdorin magnete e të tjerë lazerë, Helion me magnete e shtrydh përzierjen e karburantit dhe planifikon ta nxjerrë rrymën drejtpërdrejt nga fushat magnetike. Kur ndodh fuzioni, plazma që zgjerohet shtyn mbi fushat magnetike, dhe ajo forcë thithet si rrymë - një parim i ngjashëm me frenimin regjenerues te automjetet elektrike. Në letër, kjo do të mund ta përmirësonte në mënyrë dramatike efikasitetin. Në letër.

Sepse pikërisht aty qëndron skepticizmi. Një pjesë e ekspertëve të fuzionit s'janë të bindur se puna do të funksionojë siç premtohet. Drejtori ekzekutiv Dejvid Kërtli përgjigjet shkurt e me vetëbesim: „Nuk duam të teorizojmë për fuzionin. Vetëm duam ta ndërtojmë.” Vetëbesimi është i lirë derisa centrali të prodhojë vatin e parë për rrjetin.

Helion s'është vetëm në këtë garë. Focused Energy mblodhi së fundi 240 milionë, Thea Energy 100 milionë, Inertia Energy doli nga hija me një raund prej 450 milionësh, ndërsa Type One Energy ndjek 250 milionë. Pse investitorët grumbullojnë para në një teknologji që s'do të japë central komercial para mesit të viteve 2030? Sepse kompanitë e IA-së po vdesin urie për rrymë që punon ditë e natë, dhe fuzioni premton begati nga uji i detit. Premtimi është i stërmadh - po ashtu edhe afatet.