Стартапот за фузија Helion, поддржан од Сем Алтман, собра нови 465 милиони долари при проценета вредност од 15,5 милијарди. Парите доаѓаат додека компанијата трча да го заврши Orion, својата прва централа, со ветувањето да испорача фузиска струја на мрежата веќе во 2028 – според договорот со Microsoft. Со оваа рунда, вкупното финансирање достигна 1,5 милијарди долари.

Helion оди по поинаков пат од конкуренцијата. Додека едни користат магнети, други ласери, Helion со магнети ја стиснува гориво-смесата и планира електрицитетот да го извлекува директно од магнетните полиња. Кога ќе се случи фузија, плазмата што се шири притиска врз магнетните полиња, и таа сила се црпи како струја – принцип сличен на регенеративното сопирање кај електричните возила. На хартија, тоа би можело драматично да ја подобри ефикасноста. На хартија.

Бидејќи токму тука стои скептицизмот. Дел од експертите за фузија не се убедени дека работата ќе профункционира како што се ветува. Извршниот директор Дејвид Кертли одговара кратко и самоуверено: „Не сакаме да теоретизираме за фузија. Само сакаме да ја изградиме”. Самоувереноста е евтина додека централата не произведе првиот ват за мрежата.

Helion не е сам во оваа трка. Focused Energy неодамна собра 240 милиони, Thea Energy 100 милиони, Inertia Energy излезе од сенка со рунда од 450 милиони, а Type One Energy гони 250 милиони. Зошто инвеститорите трупаат пари во технологија што нема да даде комерцијална централа пред средината на 2030-тите? Затоа што ВИ-компаниите гладуваат за струја што работи деноноќно, а фузијата ветува изобилство од морска вода. Ветувањето е огромно – роковите, исто така.