Aeroplanmbajtësja më e re dhe më e madhe amerikane, USS „Gerald R. Ford”, pothuajse u humb - jo nga një sulm armik, por nga një zjarr në... lavanderi. Pamjet që dolën së fundi në publik tregojnë pasoja shkatërruese në një anije që konsiderohej maja e teknologjisë detare amerikane. Zjarri shpërtheu në mars, ndërsa anija kryente operacione kundër Iranit në Detin e Kuq.

Zjarri nisi nga tharëset e rrobave dhe u përhap nëpër dhomat e gjumit. Rezultati: rreth 600 marinarë mbetën pa vend për të fjetur, me vetëm korniza metalike të karbonizuara krevatesh nën tavane të shkrira dhe kabllo të zhveshura që varen nga lart. Anija u desh të riparohej urgjentisht në Greqi para se të kthehej në Norfolk, Virxhinia. Për një anije që kushton miliarda, pamja është thuajse poshtëruese.

Por detaji më alarmant s'është dëmi - por pse pati fare. Sistemi i integruar automatik për shuarjen e zjarrit dështoi plotësisht. Marinarët u detyruan ta luftonin zjarrin me dorë, dhe u deshën rreth 30 orë për ta shuar dhe siguruar zonën. „Seriozisht mendova se do ta humbnim anijen”, deklaroi një marinar, duke shtuar se „në një situatë të tillë ke vetëm dy zgjedhje - ose lufton ose vdes”.

Dy marinarë u trajtuan me plagë të lehta. Por mesazhi është më i madh se shifrat: nëse anija luftarake më e shtrenjtë e ushtrisë më të fuqishme në botë pothuajse u dogj nga një zjarr në lavanderi dhe një sistem që s'u aktivizua, atëherë sa vlen epërsia teknologjike në letër? Një anëtar anonim i ekuipazhit e tha më drejtpërdrejt: „Kjo s'duhej të kishte ndodhur. Sistemi duhej ta shuante zjarrin menjëherë.” Ndonjëherë kërcënimi më i madh për një fuqi s'vjen nga armiku, por nga tharëset e veta.