Tre veta pohojnë se humbën 1,8 milionë dollarë (rreth 1,6 milionë euro) në bitkoin sepse shkarkuan nga App Store një aplikacion që dukej si i vërteti. Padia u parashtrua të premten para Gjykatës së Qarkut për Kaliforninë Veriore dhe është drejtuar drejtpërdrejt ndaj Apple-it.

Aplikacioni quhej Sparrow Wallet. Këtu është detaji kyç: Sparrow-i i vërtetë, një portofol për bitkoin, nuk ekziston fare për iOS. Kjo do të thotë se nuk kishte version të vërtetë me të cilin i rremi mund të krahasohej - kushdo që e kërkonte në dyqanin e Apple-it gjente vetëm kopjen. Sipas padisë, Xhejms Ramirez humbi rreth 875.000 dollarë, Kristofer Elis rreth 840.000, ndërsa Xhejlen Delgado rreth 120.000.

Paditësit nuk shkojnë pas ndonjë hollësie teknike. Shkojnë drejt te fjalia me të cilën Apple e shet dallimin mes vetes dhe konkurrencës. „Si pjesë e një fushate të gjatë marketingu, Apple e pozicionoi veten, produktet dhe shërbimet e veta, sikur të ofronin një nivel sigurie dhe besueshmërie superior ndaj çdo kompanie konkurruese teknologjike”, thuhet në padi. „Duke ruajtur kontroll ekskluziv mbi atë se cilat aplikacione lejohen në pajisjet e Apple-it, kompania e strukturoi platformën e vet ashtu që konsumatorët të varen plotësisht nga premtimi i saj për siguri.”

Ky është i njëjti argument me të cilin Apple mbrohet me vite nga rregullatorët kur kërkojnë hapjen e ekosistemit - dyqane të palëve të treta, instalim aplikacionesh nga jashtë. Kopshti i mbyllur është më i sigurt, thotë mbrojtja. Padia thotë: nëse është më i sigurt, atëherë mbajeni përgjegjësinë kur nuk është.

Ka edhe diçka tjetër. Krijuesi i Sparrow-it të vërtetë, Kreg Ro, ishte ankuar publikisht se kopjet e rreme qëndrojnë në dyqan - që do të thotë se paralajmërimi nuk erdhi nga një përdorues anonim, por nga njeriu që e bëri produktin. Apple refuzoi të komentojë për padinë, por njoftoi se aplikacionet që paraqiten si të tjera janë shkelje e rregullave dhe se i heq shpejt. Shtoi edhe se aktualisht nuk ka asnjë kopje të Sparrow Wallet në dyqan.

Kompania u thirr edhe në analizën e vet: në vitin 2025 refuzoi mbi 371.000 aplikacione të parashtruara që kopjonin të tjera, ishin spam ose i çonin përdoruesit në mashtrim. Shifra është mbresëlënëse dhe njëkohësisht nuk dëshmon asgjë - 371.000 të kapura nuk thonë sa kaluan. Pikërisht kjo është pyetja para gjykatës.

Të tre kërkojnë juri, kthimin e parave dhe dëmshpërblim, por kërkojnë edhe diçka tjetër: që Apple të vendosë paralajmërime dhe shpjegime për rreziqet në App Store. Kjo është kërkesa që kompania e do më së paku, sepse nuk paguhet një herë. Nëse gjykata e pranon, „e kontrolluar nga Apple” pushon së qeni garanci dhe bëhet vetëm edhe një hap në procedurë.