Apple тужена за 1,8 милиони долари земени преку лажен паричник: затворената продавница ѝ беше главниот аргумент, сега ѝ е главниот проблем

Тројца луѓе тврдат дека изгубиле 1,8 милиони долари (околу 1,6 милиони евра) во биткоин затоа што симнале апликација од App Store што изгледала како вистинската. Тужбата е поднесена во петокот пред Окружниот суд за Северна Калифорнија и е насочена директно кон Apple.

Апликацијата се викала Sparrow Wallet. Тука е клучниот детал: вистинскиот Sparrow, паричник за биткоин, воопшто не постои за iOS. Тоа значи дека немаше вистинска верзија со која лажната можела да се спореди – секој што ја барал во продавницата на Apple, ја наоѓал само копијата. Според тужбата, Џејмс Рамирез изгубил околу 875.000 долари, Кристофер Елис околу 840.000, а Џејлен Делгадо околу 120.000.

Тужителите не одат по некоја техничка ситница. Одат право по реченицата со која Apple ја продава разликата меѓу себе и конкуренцијата. „Како дел од долготрајна маркетиншка кампања, Apple се позиционираше себеси, своите производи и услуги, како да нудат ниво на безбедност и доверливост супериорно во однос на која било конкурентска технолошка компанија”, стои во тужбата. „Со тоа што задржа исклучива контрола врз тоа кои апликации се дозволени на уредите на Apple, компанијата ја структурираше својата платформа така што потрошувачите целосно зависат од нејзиното ветување за безбедност.”

Тоа е истиот аргумент со кој Apple со години се брани од регулаторите кога бараат отворање на екосистемот – трети продавници, инсталирање апликации однадвор. Затворената градина е побезбедна, гласи одбраната. Тужбата вели: ако е побезбедна, тогаш сносете ја одговорноста кога не е.

Има и уште нешто. Творецот на вистинскиот Sparrow, Крег Ро, јавно се жалел дека лажните копии стојат во продавницата – што значи дека предупредувањето не дошло од анонимен корисник, туку од човекот што го направил производот. Apple одби да коментира за тужбата, но соопшти дека апликациите што се претставуваат како други се прекршување на правилата и дека брзо ги отстранува. Додаде и дека моментално нема ниту една копија на Sparrow Wallet во продавницата.

Компанијата се повика и на својата анализа: во 2025 година одбила над 371.000 поднесени апликации што копирале други, биле спам или ги воделе корисниците во заблуда. Бројката е импресивна и истовремено ништо не докажува – 371.000 фатени не кажува колку поминале. Точно тоа е прашањето пред судот.

Тројцата бараат порота, враќање на парите и отштета, но бараат и нешто друго: Apple да постави предупредувања и објаснувања за ризиците во App Store. Тоа е побарувањето што компанијата најмалку го сака, бидејќи не се плаќа еднаш. Ако судот го прифати, „проверено од Apple” престанува да значи гаранција и станува само уште еден чекор во постапка.