Kur asfalti arrin 64 gradë, nuk është më çështje rehatie - por mbijetese. Kryeqyteti indian Delhi prej javësh pillet nën një valë të skajshme të nxehti, me temperatura zyrtare ditore mbi 40 gradë, por kamerat termike zbulojnë diçka shumë më të tmerrshme: sipërfaqet e rrugëve, makinave dhe betonit nxehen deri në 64 gradë, një rrezik që i godet më shumë më të varfrit.

Dallimi mes „43 gradëve" në parashikim dhe „64 gradëve" në rrugë qëndron te metoda e matjes. Shifrat zyrtare e masin temperaturën e ajrit në kushte standarde; kamerat termike e kapin nxehtësinë sipërfaqësore. Studiuesit dokumentuan se, ndërsa në hije nën një mbikalim ishin 42 gradë, një motoçiklist që priste te semafori nën diellin e drejtpërdrejtë ishte i ekspozuar në 64. Vetëm tre metra më tej, nën një pemë, temperatura ra në 39,8.

Mjekët paralajmërojnë se trupi pushon së funksionuari normalisht kur kalon 40 gradë - pasojnë rraskapitja, dhimbjet e kokës, dhe në rastet e rënda hutimi, ngërçet dhe dështimi i organeve. Rekomandimi është i thjeshtë: ujë, veshje të çelëta, shmangia e punës në natyrë mes orës 10:30 dhe 15. Por kjo është luks që të varfrit në Delhi nuk e kanë.

Pranë Kalasë së Kuqe, shitësit e rrugës mbijetojnë në një trotuar që mat 57 gradë. „Çfarë zgjedhjeje kemi ne të varfrit?", pyet një grua që shet fruta të thata, me marramendje dhe probleme me shikimin. Një shitës tjetër përshkruan një ferr pa rrugëdalje: „Nuk ka lehtësim as ditën as natën. Edhe pas dushit nuk mund të fle. Ventilatori vetëm fryn ajër të nxehtë." Ballkani i mban mend valët e veta të të nxehtit, por edhe ata që mendojnë se ky është „problem i të tjerëve" duhet të ndalen: vapa që po pjek Delhin sot është e njëjta që çdo verë te ne godet gjithnjë e më fort. Pyetja nuk është nëse do të arrijë te ne - por sa të gatshëm jemi kur të arrijë.