Prerja bob sërish është kudo - dhe parukierët po vërejnë një model interesant: shumë gra e zgjedhin pikërisht pas një ndryshimi të madh në jetë. Nuk është rastësi.

Trendin këtë herë e mbajnë emra si Rozalia, Karol Xhi dhe Bijonse, e bashkë me to edhe Margo Robi, Demi Mur dhe Penelope Kruz - duke dëshmuar se bobi nuk zgjedh as moshë as stil. Pedro Moreno, menaxher edukativ në Jean Louis David, shpjegon pse kjo prerje mbijeton çdo sezon mode: „Është një nga ato prerje që në fakt kurrë nuk dalin nga moda - do të thotë elegancë, larmi dhe mundësi që ta ndryshosh pamjen pa një ndryshim drastik.“

Këtu qëndron edhe pjesa psikologjike. Parukierët thonë se gratë shpesh vijnë në sallon pas një kthese të rëndësishme - fundi i një lidhjeje, një punë e re, një fillim i ri - duke kërkuar një ndryshim të dukshëm. Bobi zë një vend të veçantë: jep ndjesinë e ripërtëritjes, por pa një prerje radikale. Flokët bien, dhe me to diçka e vjetër.

Sot nuk ekziston një bob i vetëm, por një familje e tërë variantesh - bobi italian, clavicut, old money bob, blunt bob - të gjithë me linja të pastra dhe pamje të shëndetshme, të përshtatura me teksturën dhe personalitetin. Këshilla e stilistëve është e thjeshtë: sillni një fotografi si referencë, por dijeni se një parukier i mirë nuk kopjon verbërisht. Dallimi mes një prerjeje të zakonshme dhe një të shkëlqyer nuk është te gërshërët, por te fakti nëse mjeshtri do të njohë se kush jeni vërtet - dhe jo vetëm se kujt doni t'i ngjani.