Drejtoresha menaxhuese e Fondit Monetar Ndërkombëtar, Kristalina Georgieva, paralajmëroi se konflikti në Lindjen e Mesme do t'i godasë më rëndë shtetet e varfra pa rezerva energjetike të veta.

Lufta tashmë po e shtyn botën drejt inflacionit më të lartë dhe rritjes më të ngadaltë ekonomike. Prishja e furnizimeve globale me energji, veçanërisht pas bllokadës iraniane të Ngushticës së Hormuzit - nëpër të cilën kalon rreth një e pesta e tregtisë botërore me naftë dhe gaz - e ka ulur ofertën globale të naftës për 13 përqind.

Georgieva theksoi se shtetet e cenueshme që nuk kanë kapacitet fiskal për të mbrrojtur qytetarët nga rritja e çmimeve janë më të goditurat. 85 përqind e anëtarëve të FMN-së importojnë energji, gjë që i ekspozon drejtpërdrejt ndaj këtyre goditjeve.

Parashikimet e mëparshme të FMN-së për rritje globale prej 3,3 përqind në vitin 2026 dhe 3,2 përqind në vitin 2027 tani po rishikohen në ulje për shkak të konfliktit.

Pasojat i ndiejnë madje edhe eksportuesit. Katari, për shembull, mund të ketë nevojë për tre deri në pesë vjet për të rivendosur 17 përqind të prodhimit të gazit natyror. Agjencia Ndërkombëtare e Energjisë ka dokumentuar dëme në 72 objekte energjetike, nga të cilat një e treta ka pësuar dëme serioze.

Programi Botëror për Ushqimin paralajmëron se miliona njerëz mund të përballen me uri akute nëse luftimet vazhdojnë deri në qershor.