Përkrahësit e liderës opozitare venezuelase dhe fituese së Çmimit Nobel për Paqe, María Corina Machado, dolën në gjithë vendin dhe kërkuan kthimin e saj të sigurt dhe zgjedhje të lira. Me flamuj venezuelas, në kolona automjetesh kaluan nëpër disa qytete, tregojnë pamjet.

Machado nuk arrin të kthehet në shtëpi që kur në dhjetor udhëtoi në Oslo për ndarjen e Çmimit Nobel. Aktualisht është në Panama dhe deri tani shtatë herë pa sukses është përpjekur të kthehet, transmeton agjencia gjermane dpa. Për një grua që fitoi çmimin më prestigjioz për paqe në botë, shtatë përpjekje të dështuara për të arritur në vendin e vet flasin më shumë se çdo fjalim.

Mes demonstruesve kishte përkrahës të partive opozitare Vente Venezuela dhe Primero Justicia. Kërkuan datë të saktë për zgjedhjet presidenciale në vitin 2027 dhe thërrisnin „Liri, liri!“

Maduro ra, aparati mbeti?

Konteksti e bën historinë edhe më absurde. Disa javë pasi Machado e la fshehurazi Venezuelën, forcat amerikane në janar, në një operacion ushtarak në Karakas, e kapën liderin autoritar Nicolás Maduro. Që atëherë vendin e udhëheq ushtruesja e detyrës së presidentit Delcy Rodríguez, e cila bashkëpunon ngushtë me Uashingtonin. Rodríguez ishte zëvendëspresidentja e Maduros, dhe opozita e konsideron pjesë të sistemit të mëparshëm autoritar.

Pra: diktatori është larguar, Uashingtoni ka partner në Karakas, ndërsa nobelistja e paqes ende pret në Panama. Sa herë në Ballkan kemi parë si bie lideri, ndërsa njerëzit që ndërtuan sistemin e tij mbeten në karriget e tyre? Dhe sa herë ata që më me zë e kërkuan rënien në fund mbetën jashtë loje?