Приврзаниците на венецуелската опозициска лидерка и добитничка на Нобеловата награда за мир, Марија Корина Мачадо, излегоа низ цела земја и побараа нејзино безбедно враќање и слободни избори. Со венецуелски знамиња, во конвои минаа низ неколку градови, покажуваат снимките.

Мачадо не успева да се врати дома откако во декември отпатува во Осло на доделувањето на Нобеловата награда. Моментално е во Панама и досега седум пати неуспешно се обидела да се врати, пренесува германската агенција dpa. За жена која ја доби најпрестижната награда за мир на светот, седум неуспешни обиди да стигне до сопствената земја кажуваат повеќе од кој било говор.

Меѓу демонстрантите имало приврзаници на опозициските партии Vente Venezuela и Primero Justicia. Бараа точен датум за претседателските избори во 2027 година и извикуваа „Слобода, слобода!“

Мадуро падна, апаратот остана?

Контекстот ја прави приказната уште поапсурдна. Неколку недели откако Мачадо тајно ја напушти Венецуела, американските сили во јануари, во воена операција во Каракас, го заробија авторитарниот лидер Николас Мадуро. Оттогаш земјата ја води вршителката на должноста претседател Делси Родригез, која тесно соработува со Вашингтон. Родригез беше потпретседателка на Мадуро, и опозицијата ја смета за дел од поранешниот авторитарен систем.

Значи: диктаторот е отстранет, Вашингтон има партнер во Каракас, а нобеловката за мир сè уште чека во Панама. Колку пати на Балканот сме гледале како паѓа лидерот, а луѓето што го граделе неговиот систем остануваат на своите столчиња? И колку пати оние што најгласно го бараа падот на крајот останале надвор од играта?