Disa ditë para se presidentja e Komisionit Evropian, Ursula fon der Lajen, të zbresë në Shkup, qeveria dërgon një mesazh të ri drejt Brukselit: bisedimet me Bullgarinë të mos jenë më vetëm dypalëshe, por në format evropian, me përfaqësues të BE-së në tryezë. Kryeministri Hristijan Mickoski thotë se është e dëshirueshme që dialogu me Sofjen të vazhdojë me ndërmjetësimin e përfaqësuesve evropianë, që të dëgjohen argumentet e të dyja palëve. Vijat e kuqe, shton ai, mbeten - pa lëshime.

Në sfond qëndron shkrimi i Politico-s me seli në Bruksel, i cili, duke iu referuar dy përfaqësuesve të lartë të Komisionit, shkruan se BE-ja po përgatit „udhërrëfyes“ për anëtarësim për Malin e Zi, Shqipërinë, Ukrainën dhe Moldavinë. Maqedonia, Kosova dhe Bosnja e Hercegovina nuk janë në atë listë.

Mickoski lajmin as nuk e konfirmon, as nuk e pranon. „Atë informacion e publikoi një medium, nuk e di nëse është i saktë, e nëse është i saktë duhet të pyetet BE-ja pse është kështu“, deklaroi ai, duke kujtuar se vendi ka përmbushur pjesën më të madhe të reformave nga Agjenda e Reformave dhe Plani i Rritjes. „Nëse anëtarësimi në BE është proces në të cilin vlerësohet mbi bazë meritash, për mua kjo është e palogjikshme.“ Informacionet e tij, thotë ai, janë ndryshe.

Ndërmjetësi - rrugëdalje apo edhe një dhomë pritjeje?

Ideja për ndërmjetësim evropian ka logjikën e vet. Shkupi prej kohësh kërkon garanci se përmbushja e kushtit të tanishëm - ndryshimet kushtetuese me të cilat bullgarët do të futeshin në Kushtetutë - nuk do të pasohet me kërkesa të reja nga Sofja. Prej këtu edhe këmbëngulja për „parashikueshmëri“. Brukseli, nga ana tjetër, mbetet në qëndrimin se pikërisht ato ndryshime kushtetuese janë hapi i ardhshëm i domosdoshëm. Deri tani nuk ka konfirmim zyrtar se ndonjë format i ri është dakorduar vërtet.

Opozita nuk e blen historinë. Nga LSDM e akuzojnë kryeministrin se ua ka marrë qytetarëve të ardhmen evropiane, me retorikë që vështirë se mund të ngatërrohet me diplomacinë: „Nuk ka dy Mickoskë. Ka një hajdut. Në opozitë mbron interesin kolektiv. Në pushtet e shet.“

Maqedonia është kandidate për anëtarësim që nga viti 2005. Ukraina dhe Moldavia morën statusin e kandidatit në vitin 2022, ndërsa sipas Politico-s tashmë janë në listën për udhërrëfyes. Ndërmjetësi mund të ndihmojë vetëm nëse ka mandat dhe afat të qartë. Pa këtë, pyetja është nëse po marrim zgjidhje - apo edhe një sportel para të cilit do të presim, këtë herë me vulë evropiane.