Presidenti kroat Zoran Millanoviq dhe kryeministri Andrej Plenkoviq sërish u grindën - këtë radhë për çështjen nëse ushtarët kroatë do të marshojnë në një paradë ushtarake në Paris. Mosmarrëveshja, në dukje ceremoniale, në fakt zbulon një çarje të thellë në vetë majën e pushtetit kroat.

Millanoviq, që është komandant suprem i ushtrisë, refuzoi të miratojë pjesëmarrjen në paradë. Si arsye solli faktin se Franca më parë e kishte refuzuar ftesën kroate për përkujtimin e „Stuhisë", ndaj tani po kthen me të njëjtën masë. „Ushtria nuk do të shkojë", deklaroi ai, duke theksuar se vetëm komandanti suprem vendos për çështje të tilla.

Plenkoviq iu kthye se bëhet fjalë për një ngjarje ceremoniale që nuk kërkon miratim presidencial, dhe se kompetenca i takon ministrit të Mbrojtjes, jo presidentit. Shkoi edhe më tej - kërcënoi se do të shkarkojë shefin e Shtabit të Përgjithshëm, gjeneralin Tihomir Kundid, nëse ushtarët nuk dërgohen. Dy njerëzit më të fuqishëm në vend akuzojnë njëri-tjetrin publikisht, ndërsa ushtria rri mes tyre si peng i grindjes së tyre.

Në Ballkan e njohim mirë këtë pamje - dy institucione që, në vend se të punojnë bashkë, garojnë se kush ka më shumë pushtet, ndërsa shteti rri e pret. Pyetja që Kroacia e lë të hapur është e thjeshtë: kur presidenti dhe kryeministri nuk merren vesh as për një paradë, çfarë ndodh kur duhet një vendim i përbashkët për diçka vërtet serioze?