Polonia ende nuk ka ndërtuar asnjë fabrikë për raketa „Patriot“. Moska tashmë i dërgoi paralajmërim. Zëdhënësja e Ministrisë së Punëve të Jashtme të Rusisë, Maria Zaharova, në një brifing në Moskë tha se fabrikat e armëve në vendet evropiane që prodhojnë për Ukrainën janë objektiva të mundshme ushtarake të Rusisë. Sipas raporteve të agjencive, ajo i quajti edhe objektiva „legjitime“.

„Nuk duhet të supozohet se objektet ushtarake jashtë Ukrainës që prodhojnë armë për regjimin e Kievit do të jenë të sigurta. Kush mendon kështu, gënjen veten“, deklaroi Zaharova.

Shkaku: një paralajmërim nga Varshava

Zaharova po i përgjigjej një pyetjeje për gatishmërinë e Polonisë të hapë prodhim të raketave përgjuese për sistemin „Patriot“, të destinuara për Ukrainën. Sipas saj, hapja e fabrikave dhe e ndërmarrjeve të përbashkëta do të thotë se shtetet evropiane janë drejtpërdrejt të përfshira në konflikt. Moska pohon edhe se kjo vetëm e zvarrit zgjidhjen e tij - deklaratë që vjen në ditët kur Kievi zgjohej nën smog të dendur pas disa nga sulmeve më të mëdha ajrore të kombinuara ruse në muajt e fundit.

Varshava në javët e fundit e përsëriti disa herë se është gati. Në fund të gushtit zëvendësministri i Mbrojtjes Paweł Zalewski tha se Polonia ka kapacitet dhe vullnet të prodhojë raketa PAC-3 në territorin e saj, se është e hapur edhe për prodhim të përbashkët me Ukrainën dhe se për projektin bisedon me Lockheed Martin dhe me administratën amerikane. Javën e kaluar zëvendësministrja Magdalena Sobkowiak-Czarnecka shtoi se fabrika mund të ngrihet në Poloni, sidomos nëse Ukraina merr licencë amerikane, dhe atë në një lokacion më të sigurt - ka shumë gjasa në pjesën perëndimore të vendit.

Polonia perëndimore do të thotë sa më larg frontit. Përgjigjja nga Moska thotë: larg nuk do të thotë i sigurt.

Licenca, servise dhe biznes

Sipas pohimeve, presidenti amerikan Donald Trump qysh në fillim të korrikut, në samitin e NATO-s, paralajmëroi se Ukraina do të marrë licencë për prodhimin e „Patriot“. Zelenski për licencat bisedoi me Trumpin në Nju Jork. Ukrainës i duhen urgjentisht raketat përgjuese, dërgesat shkojnë ngadalë, prandaj deri në dimër do të duhet të mbështetet në raketa nga rezervat ekzistuese të partnerëve.

Varshava, nga ana tjetër, nuk pret vetëm licencën ukrainase. Ka paraqitur kërkesë edhe për qendër servisi për „Patriot“, ndërsa në afat më të gjatë edhe për prodhim të vet të raketave, që nuk lidhet me Ukrainën. Negociatat me Uashingtonin vazhdojnë. Për Poloninë kjo është njëkohësisht siguri, industri dhe biznes. Për Moskën - shkak i volitshëm për një mesazh për gjithë Evropën.

Logjika e „objektivit legjitim“ është e rrezikshme pikërisht sepse nuk ka kufi natyror. Sot është një fabrikë në Poloni, nesër cilido objekt që prodhon diçka për cilindo front. Ballkani ka fabrikat e veta të municionit dhe eksplozivëve, e akoma më mirë e kujton se çfarë do të thotë kur fuqitë e mëdha vendosin kush është shënjestër e kush dëm kolateral. A i lexon dikush në rajon me kujdes brifingje të tilla?

Fabrika është ende në letër, ndërsa Moska ia dërgoi adresën paraprakisht.