Еве каква ќе биде ситуацијата на граничните премини кон Грција за Божиќ и Нова година

Патниците кои планираат празнично патување кон Грција за католичкиот Божик и Новата година ќе можат полесно да ги реализираат своите планови, откако грчките земјоделци најавија привремена промена во режимот на протестите и блокадите.

Според информациите што ги пренесуваат грчките медиуми, земјоделците одлучиле да направат пауза во блокадите на патиштата и граничните премини во два временски периоди – од вторник, 23 декември, до недела, 28 декември 2025 година, како и од вторник, 30 декември, до недела, 4 јануари 2026 година.

Целта на ваквата одлука, како што наведуваат земјоделците, е да им се овозможи на граѓаните и туристите непречено да патуваат и да ги поминат божиќните и новогодишните празници во Грција, без дополнителни проблеми и долги чекања на границите.

Протестите на земјоделците започнаа на 30 ноември и опфатија околу 60 блокади низ цела Грција, вклучувајќи и неколку клучни гранични премини. И покрај привременото олеснување за време на празниците, земјоделците најавуваат дека не се откажуваат од своите барања и дека по истекот на наведените периоди, протестите може повторно да продолжат.

Во меѓувреме, премиерот на Грција, Киријакос Мицотакис, изјави дека владата веќе излегла во пресрет на голем дел од барањата на земјоделците.

„Од вкупно 27 барања, 16 веќе се исполнети или се третираат позитивно, четири се во фаза на разгледување и дискусија, додека седум не можат да бидат реализирани поради спротивност со европските правила или финансиска неизводливост“, напиша Мицотакис на Фејсбук.

И покрај ова, земјоделците остануваат на ставот дека дел од клучните проблеми сè уште не се решени, поради што најавуваат дека борбата ќе продолжи и по празниците.