ФЗО со остри мерки: Казни за лекари што препишуваат премногу антибиотици и анксиолитици

Лекарите кои ќе ги надминат дозволените квоти за препишување антибиотици и анксиолитици ќе се соочат со санкции, предупредуваат од Фондот за здравствено осигурување (ФЗО). Како што информираат од Фондот, минатата година е забележано зголемување од дури 23 проценти во употребата на антибиотикот „Сумамед“, лек кој, според медицинските протоколи, треба да се користи како последна линија на лекување.

Со воведувањето на системот Е-рецепт, кој треба целосно да профункционира наредната година, ќе има целосна транспарентност во терапиите што се препишуваат. Преку овој систем ќе може точно да се утврди за која дијагноза е даден одреден лек, дали дозата е соодветна и дали терапијата е оправдана.

Од ФЗО алармираат и за состојбите со медицинскиот кадар. Во изминатиот период е регистриран одлив на здравствени работници – најпрво од внатрешноста кон Скопје, а потоа и од јавното кон приватното здравство. Сепак, со зголемувањето на платите во јавното здравство, се бележат и први позитивни поместувања – дел од лекарите, како и две медицински сестри, неодамна се вратиле од приватниот сектор.

Дополнителен проблем што го нотира Фондот се хируршките одделенија во кои има лекари со плати и до 2.000 евра, кои ги користат сите додатоци, но не работат во операциона сала. Пациентите, според ФЗО, често се препраќаат во други болници, со образложение дека нема тим или услови за работа.

„На оваа практика мора да ѝ се стави крај“, порачуваат од Фондот, додавајќи дека одделенијата кои не даваат резултати треба да се затворат, а поддршката да се насочи кон оние здравствени установи и тимови кои навистина работат и испорачуваат квалитетна здравствена услуга.