Над 1.200 Гостиварци болни, вода од Вардар вбризгувана во градскиот вод: Кој ќе одговара?

Над 1.200 граѓани на Гостивар завршиле кај лекар за три-четири дена со исти симптоми – повраќање, дијареа, болки во стомакот, температура, слабост. Агенцијата за храна и ветеринарство (АХВ) забрани да се пие водата од градскиот водовод. А директорката на Водовод и градоначалникот? Тие сѐ уште велат дека нема доказ дека виновна е водата.

Контрадикцијата е драстична. Од една страна, институција што воведува забрана за пиење вода поради сомнеж за сериозно загадување. Од друга страна, одговорните за таа иста вода што ја „бранат“ и бараат да се почека лабораторијата. Кому да му верува граѓанинот на Гостивар додека полни шише од чешма?

Што открила инспекцијата

При вонредна инспекција на зафатот во Вруток, откриена е неовластена пумпа што директно вбризгувала вода од реката Вардар во главниот цевковод, без никакво одобрение. Според МВР, ЈП „Водовод“, во соработка со Општина Гостивар, поставило пумпи во каналите со отпадни води и вбризгувало вода директно во главниот вод за да го зголеми притисокот. Речната вода – непречистена – завршувала во системот за пиење.

Директорката на Водовод, Артана Асани, тврди дека меѓу заболените има и такви што пиеле само шишенска вода, сугерирајќи дека причината е расипана храна или високите летни температури. Градоначалникот Валбон Лимани изјави дека засега нема официјален медицински или лабораториски доказ дека стомачните проблеми се предизвикани од чешмата. „Комуналец“ пак тврди дека пумпите биле користени само кратко, на 25 и 26 јуни, за тестирање, и веднаш биле исклучени.

МВР истражува по сомнеж за загадување на водата за пиење според член 219 од Кривичниот законик. Конечните заклучоци се чекаат по лабораториските резултати и завршување на истрагата.

Но и без лабораторија, едно е јасно: некој вбризгувал вардарска вода во системот за пиење на цел град. Дали таа е причината за масовното труење или не, самиот факт дека тоа било можно – дека нечие решение за низок притисок било да се земе вода од реката – кажува сѐ за состојбата на комуналната инфраструктура. А додека одговорните мерат зборови и чекаат наоди, 1.200 Гостиварци веќе платија со своето здравје. Кој ќе одговара?