Деветнаесетти ден откако водата во Гостивар е забранета за пиење. Министерот за внатрешни работи Панче Тошковски по седницата на Кризниот штаб го кажа она што градот веќе го знае: сè уште нема вода што може да се прогласи за безбедна. Може да се користи само технички – за лична хигиена и за хигиена во домот.

За да падне забраната потребни се три последователни исправни анализи од сите мерни точки. Институтот за јавно здравје, Агенцијата за храна и ветеринарство и стручњаците од водоводот ќе го зголемат бројот на мерења. Во изминатите 24 часа во болницата во Гостивар прегледани се 78 луѓе со симптоми – бројка што паѓа, но која и понатаму значи дека граѓани секој ден одат на лекар поради вода од чешма.

Апелот што сè кажува: пуштете ја водата да истекува

Тошковски апелираше до граѓаните колку што можат повеќе да ја пуштаат водата да истекува низ чешмите, бидејќи покрај хиперхлоризацијата тоа е единствениот начин да се забрза чистењето на мрежата. Значи, среде најсушниот и најжежок период од годината, официјалниот совет е да ја трошите водата за да ја исчистите.

Во неколку примероци е пронајдена бактеријата Псевдомонас аеругиноза. Раководителката на лабораторијата на скопскиот водовод, Емилија Аневска, вели дека нејзината појава не е неочекувана – се јавува од стоена вода во цевките што не истекува. Објаснувањето е техничко и точно. Но тоа е втор проблем што се додава врз првиот, а првиот беше многу полош.

Дваесет и два дена фекалии во градскиот водовод

Ова е бројката што не смее да се изгуби во дневните извештаи. Водата е забранета од 17 јули, откако надлежните утврдија дека пумпите 22 дена внесувале вода со фекалии во градскиот водовод. Од 19 јули е прогласена епидемија. На 21 јули Владата прогласи 30-дневна кризна состојба.

Дваесет и два дена. Не два, не пет – дваесет и два. Толку време една инсталација работела погрешно без никој да забележи, во град со десетици илјади жители. До 3 август бројот на регистрирани случаи достигна 4.762 лица.

Сега се мери, се хлорира, се испушта, се известува. Сето тоа е правилно и сето тоа доаѓа откако штетата е направена. Кризниот штаб функционира беспрекорно – но кризниот штаб постои затоа што редовната контрола не постоеше. Кој ќе одговара за тие 22 дена?