Детското игралиште во Карпош 1 повторно е мета на вандализам. Оштетени се повеќе детски реквизити и дел од урбаната опрема, соопшти Општина Карпош, која ја повика полицијата што побрзо да ги пронајде сторителите.

„Општина Карпош секоја година издвојува средства за одржување, обновување и унапредување на јавните површини, а континуирано инвестира и во поставување и реконструкција на детски игралишта и урбана опрема. За жал, вложувањата во создавање безбедни и уредни простори за најмладите повторно се доведуваат во прашање поради неодговорното однесување и вандалските случаи“, стои во соопштението. Општината апелира јавните површини да се чуваат како заедничко добро.

Клучниот збор е „повторно“. Ако истото игралиште се крши повеќепати, апелите очигледно не се доволни. Дали игралиштето има камери? Дали некогаш некој бил фатен и казнет за уништување на јавен имот во Карпош? Колку пари општината досега потрошила само на поправки? Тоа се бројки што соопштението не ги дава.

Реквизитите не се кршат сами, некој ги скршил и тој треба да се најде. Но работа на институциите е следниот пат да не биде толку лесно. Во меѓувреме, децата од Карпош 1 имаат игралиште со искршени реквизити.