Реал Мадрид е пред претседателски избори, а Флорентино Перез повторно го вади аргументот што секогаш делувал – големо име, голема бројка, голема ветувачка. Овојпат сумата е 150 милиони евра за играч кого го опиша како „галактикос од рангот на Кристијано Роналдо и Кака”. Формалната понуда, тврди, оди веднаш.

Само, едно име не сака да го каже. Перез беше прецизен само околу тоа кој не е целта: „Што се однесува до Холанд, сите демантираа, значи мора да е блеф.” И додаде дека новото засилување доаѓа „од средина на теренот нагоре – не е Холанд”.

Шпанските медиуми веднаш ги извадија двете најверојатни имиња од Пари Сен Жермен – Жоао Невеш и Витиња. И двајцата се вклопуваат во описот, и двајцата би значеле тоа што Реал го бара по заминувањето на Тони Кроос – контрола на средина на теренот што клубот ја нема веќе извесно време.

Перез не пропушти да ја спомене и бројката што најмногу сака да ја повторува: клубот, вели, вреди 10 милијарди евра и е најскапиот на светот. Кога некој толку често ја кажува цената на сопственото име, тоа обично значи дека наскоро некој ќе му ја оспори.

Бидејќи целата оваа приказна доаѓа во вистинскиот момент – спроти избори, кога противничкиот кандидат Енрике Рикелме веќе ветува свои големи трансфери. Прашањето што секој навивач на Реал го знае напамет: дали 150-те милиони се вистински план или предизборен билборд? Одговорот ќе го видиме во вторник, ако понудата навистина тргне таму каде што Перез вети.