Во време кога вестите за младите најчесто се за иселување, од Прилеп доаѓа поинаква приказна. Општината издвои над еден милион денари за награди на најуспешните ученици – оние што се истакнале на државни и меѓународни натпревари, како и првенците на генерацијата.

Наградите се степенувани: за државни натпревари износите се движат од 5.000 до 7.000 денари, а за меѓународни од 7.500 до 9.000 денари. Свеченоста се одржа во паркот кај Споменикот на непобедените, а градоначалникот Дејан Проданоски ги нарече младите „амбасадори на знаењето” и порача дека нивните успеси се најсветлата иднина на градот.

Вакви гестови вредат повеќе од што изгледаат на хартија. Износите не се огромни, но пораката е важна – дека трудот на еден ученик се забележува и се цени дома, а не само кога ќе замине во странство. Прашањето што останува за сите наши општини е едноставно: дали наградата ќе биде само еден ден на фотографирање, или почеток на сериозна политика што ги задржува паметните глави тука, наместо да ги испраќа на аеродром?