Софија понуди помош, Скопје одби: што договорија Муцунски и Георгиев за мазутот

Македонското Министерство за надворешни работи попладнево ја потврди информацијата од Софија дека се остварил телефонски разговор меѓу шефовите на дипломатиите на Северна Македонија и Бугарија, во кој била отворена темата за снабдувањето со мазут и актуелната енергетска состојба во земјава.

Како што соопшти МНР, разговорот го воделе министерот за надворешни работи и надворешна трговија Тимчо Муцунски и неговиот бугарски колега Георг Георгиев, при што Бугарија понудила помош за надминување на проблемите со енергенсите.

„Министерот Муцунски изрази благодарност за понудената помош, при што нагласи дека во моментов нема потреба од дополнителна поддршка, бидејќи состојбата е стабилна“, информираат од Министерството за надворешни работи.

Во исто време, Муцунски му порачал на Георгиев дека Северна Македонија останува подготвена да ѝ помогне на Бугарија, доколку таму се појави потреба од ваква или слична поддршка, што од МНР го оценуваат како гест на добрососедство и взаемна солидарност.

Понудата за помош од Бугарија доаѓа само еден ден откако македонската Влада донесе одлука за прогласување кризна состојба во снабдувањето со електрична енергија на целата територија на државата, во времетраење од седум дена. Одлуката беше донесена поради отежнатата набавка на енергенси и ризиците за стабилноста на енергетскиот систем.

Иако официјално институциите уверуваат дека состојбата е под контрола, разговорот меѓу Скопје и Софија укажува дека енергетските предизвици остануваат тема од висок регионален интерес, особено во услови на блокади, санкции и нестабилни пазари на енергенси.