Стручна комисија ќе проверува дали починатото новороденче на Клиниката за гинекологија и акушерство (ГАК) било соодветно лекувано. Комисијата ќе ја формира Министерството за здравство, по иницијатива на Државниот санитарен и здравствен инспекторат (ДСЗИ), откако вчера беше извршен вонреден инспекциски надзор на Клиниката.

Според ДСЗИ, причините за смртта на новороденчето од Арачиново, кое починало на 1 октомври – само три дена по раѓањето, се отежнато дишење и сериозни компликации на белите дробови и другите витални органи. Бебето претходно, на 29 септември, било двапати реинтубирано.

– На 1 октомври се влошила состојбата на детето, по што биле повикани детски кардиолог и детски хирург. Поставен е дрен поради масивен пнеумоторакс, а извршен е и ултразвучен преглед на мозок со наод на едем на мозокот. Поради тешката состојба е пристапено кон кардио-пулмонална реанимација, но без успех – изјави директорот на ДСЗИ, Кирил Лазов.

Причината за смрт, според него, е масивен пнеумоторакс, белодробен емфизем, едем на мозокот и кардиореспираторна инсуфициенција. Побарана е и обдукција на Институтот за патологија при Медицинскиот факултет во Скопје, но извештајот сè уште не е готов.

Сепак, во извештајот на интерната комисија за квалитет при Клиниката се наведува дека критичниот ден била донесена одлука за реинтубација од страна на дежурен педијатар, при што постапката била неуспешна, траела околу 20 минути и наводно довела до оштетување на грлото на новороденчето. Овие наводи биле писмено пријавени и од началничката на Интензивна нега до директорката на ГАК.

И покрај тоа, од ДСЗИ велат дека во работата на Клиниката засега не се утврдени недостатоци. Паралелно, случајот го истражува и Основното јавно обвинителство – Скопје, кое отворило предмет, а семејството на починатото бебе најави и приватна тужба.

Клучни одговори се очекуваат од резултатите од обдукцијата, која сè уште е во тек.