Трагедија кај Кавадарци: Ловец загина по пад од карпа, пожарникари со часови го извлекувале телото

Кавадарчанец трагично го загубил животот по пад од стрмен планински предел за време на лов, а неговото тело вчера било извлечено по долга и исклучително ризична интервенција на пожарникарите од Територијалната противпожарна единица Кавадарци.

Телото било лоцирано на исклучително непристапен и лизгав терен, во бездна длабока околу 150 метри, каде што пристапот бил невозможен без специјална алпинистичка опрема. Поради сериозната опасност, пожарникарите со часови се движеле врзани со јажиња, внимателно обезбедувајќи се еден со друг, за да спречат нова несреќа.

„До нас беше доставено барање за извлекување на безживотно тело на наш сограѓанин кој доживеал несреќа при лов. Веднаш интервениравме со пет пожарникари и опрема за работа на височина. Со придружба на припадници на МВР Кавадарци и членови на семејството се упативме кон длабокиот и непристапен терен“, информираат од ТППЕ Кавадарци.

Од таму додаваат дека поради сложеноста на теренот, интервенцијата траела цел ден, при што пожарникарите морале да користат алпинистичка техника и постојано обезбедување.

По завршување на акцијата, телото било успешно извлечено од бездната и предадено на надлежните безбедносни служби, додека семејството и полицијата чекале на безбедна локација.

Оваа трагедија уште еднаш ја потсетува јавноста на сериозните ризици од ловот на непристапни и опасни терени, особено во зимски услови.