Меѓу сите вести за притвори, провизии и депонии, доаѓа и една што ја омекнува сликата: скопската Зоолошка градина доби нови жители. Белите волци добија подмладок – две мали волчиња што веќе го привлекоа вниманието на целиот тим на градината.

Малечките сè уште се во раните денови од животот и најмногу се кријат близу мајката, во дупки и засолништа – токму како што прават и во дивината, каде првите денови ги поминуваат скриени и заштитени. Од градината велат дека вработените им посветуваат особено внимание за да имаат мир и спокој во овие критични први недели.

Фотографиите се ретки токму поради тоа – волчињата најголемиот дел од времето се сокриени, а снимките се направени во кратките моменти кога ќе се осмелат да излезат. Од Зоолошката ги охрабруваат посетителите да навратат со трпение и малку среќа за да ги здогледаат новите членови. Мала, но добра вест – а понекогаш токму таа е најпотребна.