Висок ризик од лавини на Шар Планина: Забележана лавина, опасност од степен четири

На територијата на Националниот парк „Шар Планина“ е регистриран висок ризик од појава на лавини, особено во повисоките делови на планината над 1.700 метри надморска височина, информираат од управата на паркот. Надлежните апелираат до посетителите да бидат исклучително претпазливи и да избегнуваат движење во потенцијално опасни лавински зони.

Забележана лавина, без човечки жртви

Екипа на Националниот парк „Шар Планина“ извршила теренска проверка по добиена дојава од операторот за слободно скијање со ратраци „Ескимо спорт“, за појава на лавина на подрачјето на паркот.

Претходно, тимот на операторот спровел пребарување на лавинскиот терен со специјализирана лавинска опрема, при што било утврдено дека во лавината нема затрупани лица кои носеле лавински уреди. До овој момент нема пријави за исчезнати лица.

„За среќа, настанот помина без човечки жртви“, соопштија од Националниот парк.

Лавинска опасност од висок степен

Според стручната анализа спроведена на терен, утврден е висок степен на нестабилност на снежната покривка. Лавинската опасност е оценета со степен четири, според европската скала за проценка на лавински ризик, што претставува сериозна закана за безбедноста на планинарите, скијачите и другите посетители.

Зголемената опасност е резултат на комбинација од специфични временски услови во изминатите денови, вклучувајќи:

• промени во температурата на воздухот,

• силен и променлив ветер,

• интензивни снежни врнежи,

• како и релјефните карактеристики на планинскиот терен.

Апел до посетителите

Од Националниот парк „Шар Планина“ апелираат посетителите:

• да избегнуваат движење во потенцијални лавински зони,

• да не се движат во повисоките делови на планината без придружба на квалификувани и стручно обучени лица,

• навремено и точно да ја пријавуваат својата посета преку официјалната веб-страница на паркот.

„Нашите стручни служби, во соработка со туристичките оператори и експертите за лавини, континуирано ја следат состојбата на теренот и лавинската опасност“, велат од управата на паркот.

Надлежните повторно потенцираат дека безбедноста на посетителите е приоритет и повикуваат на одговорно однесување во услови на зголемен природен ризик.