Воздухот и вечерва е ужасно загаден во цела Македонија, најлошо е во Кавадарци, Струмица и Тетово

Како и во текот на целата измината недела, воздухот во повеќе македонски градови и вечерва е на алармантно високо ниво на загадување, кое според мерните станици се категоризира како „екстремно нездраво“ и „опасно“. Околу 20 часот, највисоки вредности на AQI-индексот се регистрирани во Кавадарци (352), Струмица (339) и Тетово (338).

Особено загрижувачки се концентрациите на ПМ2,5 честичките, кои на одредени места се и до 20 пати над дозволените граници. Според Светската здравствена организација, ваквото загадување може да предизвика здравствени проблеми дури и кај целосно здрави лица, додека хронично болните, децата, постарите лица и луѓето со респираторни заболувања се во особено висок ризик и треба да останат во затворен простор.

Состојбата е многу лоша и во Кичево, Гостивар, како и во повеќе делови од Скопје, каде индексот на загаденост се движи меѓу 200 и 300. Директорот на Клиниката за пулмологија, д-р Оливер Зафировски, за „Слободен печат“ изјави дека екстремното загадување во последните денови довело до зголемен број пациенти и значителен притисок врз здравствениот систем.

Експертите предупредуваат дека моменталните метеоролошки услови дополнително ја влошуваат ситуацијата. Во вечерните часови, поради ниските температури, маглата и котлинската поставеност на повеќето градови, честичките од согорување на огревно дрво, издувните гасови и индустриското загадување подолго време остануваат задржани во воздухот, без можност за природно прочистување.