Supabase ја удвои проценетата вредност на 10 милијарди долари за осум месеци – и тоа додека повеќето стартапи се борат да задржат една иста цифра. Компанијата собра 500 милиони долари во круг Серија Ф, што ја прави нов „декакорн”, термин за стартап вреден над десет милијарди. Пред тоа, во октомври собра 100 милиони при вредност од пет милијарди, а само неколку месеци претходно – 200 милиони при две милијарди. Кривата оди нагоре толку брзо што речиси не стасуваш да ја следиш.

Што всушност прави Supabase? Нуди база на податоци со отворен код, изградена врз популарниот Postgres – инфраструктура на која програмерите ги градат своите апликации без сами да ја одржуваат позадината. Расте затоа што „vibe-coding” алатките, односно создавањето софтвер преку ВИ, експлодираа. Бројот на бази лансирани преку Supabase скокнал над 600 проценти за една година, а над 60 проценти од нив се покренати преку некаква ВИ-алатка.

Корисниците? Близу 10 милиони програмери, бројка удвоена за осум месеци. Извршниот директор и кососнивач Пол Коплстон заслугата ја дава на алатки како Claude Code и Codex, бидејќи тие „го прошируваат бројот на луѓе што можат да градат”. Supabase е база и за Bolt, Figma, Lovable, Replit и други познати имиња.

Интересна е и филозофијата зад компанијата. Коплстон отворено одби да влезе во „расипувањето” на алатките за програмери – не сака да им угодува на големите корпорации што нудат милионски договори, а потоа диктираат како да изгледа производот. Се држи до сопствената визија, што е спротивно од она што го прават повеќето стартапи. Тешко е да се спори со резултатот, ама вреди да се запамети дека секоја вредност што се удвојува на секои неколку месеци еден ден мора да најде дно – прашањето е само дали тоа дно ќе биде наскоро или дури кога ВИ-еуфоријата ќе се олади.

Кругот го предводеше GIC, со учество на постоечки инвеститори како Stripe и нови имиња како Georgian и Salesforce Ventures. Парите доаѓаат, корисниците растат – но во индустрија каде вредноста се мери со надеж колку и со приход, бројката од десет милијарди е исто толку прогноза колку и факт.