Три дена, еден парк и многу влажни носови. „Лајка Фест” во скопскиот Градски парк успеа да направи нешто што кај нас ретко се случува – да ги собере институциите и граѓаните околу проблем за кој обично сите се прават дека не постои: бездомните кучиња.

Манифестацијата, организирана од ЈП „Лајка” – Скопје, не беше само изложба на милерки за вдомување. Започна со панел-дискусија во Советот на Град Скопје, на која учествуваа претставници од Ветеринарниот факултет, Агенцијата за храна и ветеринарство, граѓански организации и експерти од Загреб, Сараево и Шпанија. Темите беа конкретни – стерилизација, одговорно сопствеништво и улогата на локалната власт.

Потоа следеа два дена интерактивна програма во паркот, со над 50 регистрирани учесници, повеќе од 20 спонзори и партнери, и голем интерес на семејства, деца и сопственици на миленици. Можност за едукација, но и за вдомување – бидејќи зад секое бездомно куче, како што се потсети на фестивалот, обично стои човечка неодговорност и напуштање.

И тука е поентата што вреди да се запомни. Проблемот со бездомните кучиња во секој македонски град обично се сведува на две крајности – или на бесконечно префрлање одговорност меѓу институции, или на повикување да се „реши” со најбрутален можен метод. Фестивал што наместо тоа нуди стерилизација, едукација и вдомување е редок пример на нормален, цивилизиран пристап. Прашањето е само дали ќе остане еднократен настан за добра фотографија – или навистина почеток на систем што го решава проблемот од корен.