Доналд Трамп повторно соопшти победа на својот стил – кратко, гласно и без многу детали. Овојпат тврди дека американската војска убила еден од најбараните криминалци на светот: Хектор Гереро Флорес, водачот на злогласната банда Трен де Арагуа, која потекнува од венецуелските затвори.

Според објавата, акцијата ја извело Јужното командување на САД, наводно координирано со венецуелски сојузници. Гереро се товари за трговија со дрога, шверц на луѓе, перење пари и водство на она што Трамп го нарече „една од најкрвавите терористички организации на планетата”. Стејт департментот веќе ја има прогласено бандата за странска терористичка организација.

Како и обично кај вакви објави, недостасуваат токму деталите што најмногу значат. Трамп не кажа каде се случила акцијата, ниту како точно. Кога една влада објавува ликвидација без локација, без независна потврда и без тело, останува само да ѝ веруваме на збор – а владите ретко го заслужуваат тоа на доверба.

Зад приказната за еден убиен криминалец стои поголема игра. Трамп тврди дека бандата дејствувала во САД во спрега со владата на Николас Мадуро во Венецуела – со што една операција против криминал станува и дипломатско оружје против една држава. Балканот ги познава ваквите приказни: кога борбата против криминалот совршено се поклопува со политичките интереси на оној што ја води, вреди да се запрашаме каде завршува правдата, а каде почнува пораката.