Уметник што со молив му се потсмеваше на Кремљ е застрелан среде бел ден на улица во Полска. Рускиот карикатурист Семјон Скрепетски (44) бил убиен во понеделникот наутро во Бјала Подласка, источна Полска, недалеку од границата со Белорусија. Полицијата сомнева на нарачано убиство.

Скрепетски побегнал од Русија во 2021 година, од страв за политички прогон. Беше познат по сатиричните цртежи насочени против Владимир Путин, чеченскиот лидер Рамзан Кадиров и други од руската власт. Само неколку дена пред смртта протестираше пред руската амбасада во Берлин, држејќи цртеж на кој советскиот водач Сталин го храни младиот Путин. Молив наспроти куршум – и моливот загуби.

Според полицискиот портпарол, „ако некој пристапи кон конкретна личност на улица и пука, сè укажува на намера да се убие”. Набргу по пукотницата близу белорускиот конзулат бил приведен човек за кого се сомнева дека е белоруски државјанин, иако властите сè уште официјално не потврдиле апсење. Инцидентот доаѓа среде заострени односи меѓу Варшава и Москва за наводни хибридни операции.

Балканот добро ја знае оваа приказна – дисидент што бега од дома мислејќи дека границата е заштита, па дома го стигнува таму каде што не очекувал. Кога критичар на режим не е безбеден ниту илјада километри подалеку, пораката не е упатена само до мртвиот. Таа е упатена до сите што уште цртаат, пишуваат или зборуваат. Прашањето е кој следен ќе го прочита знакот – и дали воопшто има безбедно растојание од моќ што не поднесува потсмев.