Хрватските пратеници гласаа за повторно воведување на задолжителна воена служба, со цел зајакнување на одбранбените капацитети на земјата во услови на глобална нестабилност и зголемени безбедносни ризици, вклучително и во контекст на војната во Украина.

Загреб ја укина регрутацијата во 2008 година, една година пред приклучувањето кон НАТО, со цел да ја професионализира армијата. Но, поради актуелните геополитички состојби, владата смета дека повторното воведување на основна воена обука е неопходно.

„Сведоци сме на зголемување на различни видови закани кои бараат брза и ефикасна реакција од општеството“, изјави министерот за одбрана Иван Анушиќ, додавајќи дека „одбраната на земјата е клучна во услови на секоја потенцијална закана“.

Според новиот закон, околу 18.000 мажи секоја година ќе бидат регрутирани на возраст од 18 години за двомесечна воена обука. Жените ќе бидат ослободени, а оние кои поради убедувања одбиваат да служат војска, ќе можат да изберат цивилна служба од три до четири месеци, вклучително и работа во тимови за одговор при катастрофи.

Пратениците изгласаа измени на два закона – за одбрана и за служба во вооружените сили. Измените ги поддржаа 84 од 151 пратеник за првиот закон и 110 за вториот.

Редовниот воен персонал ќе добива плата од 1.100 евра месечно, додека износот за цивилната служба допрва ќе се утврди, но се очекува да биде значително понизок. Воените лица ќе имаат предност при аплицирање за работа во јавни институции по завршување на службата.

Левичарската опозиција го критикуваше законот, оценувајќи дека тој дискриминира жени и лица во цивилна служба, бидејќи тие нема да имаат исти привилегии ниту еднакви примања.

Хрватска, со население од околу 3,8 милиони жители, е членка на НАТО и ЕУ, а иницијативата за враќање на задолжителната воена служба треба да започне со примена во текот на 2026 година.