На 16 септември, среде работен ден, маж влегол во приватна гинеколошка ординација во поликлиниката „Букурешт“ во Карпош. Прво му се заканувал на докторот Дејан Огненовиќ, а потоа го нападнал со повеќе удари. Лекарот заврши со скршен вратен пршлен. Во ординацијата имало и други луѓе – и нив, според обвинителството, напаѓачот ги исплашил.

Една недела подоцна, Основното јавно обвинителство Скопје отвори истражна постапка за кривичното дело „насилство“ од член 386 од Кривичниот законик. Притвор не побара. До судијата на претходна постапка предложи мерки на претпазливост: осомничениот да биде достапен за постапката и да не му се приближува ни на лекарот ни на ординацијата.

Да се каже работата со вистинското име: ова не е „инцидент“ и не е „несогласување“. Некој влегол на туѓо работно место и на човек што работи му скршил пршлен. Името на осомничениот не е објавено, но делото е – и тоа е доволно.

Заканите пред ударите

Огненовиќ пред медиумите изјави дека нападот бил кулминација на низа закани што ги добивал претходно и дека се плаши за својата и за безбедноста на своето семејство. Случајот го пријавил во полиција истиот ден. Според неговото сведоштво, пријава поднел и до внатрешната контрола на МВР, бидејќи една недела случајот не се процесирал. Од МВР го дадоа одговорот што го знаеме напамет: се преземаат мерки за целосно расчистување. Прашањето е што се случува со заканите пред да станат удари.

Лекарската комора остро го осуди нападот. „Потсетуваме дека нападот врз здравствен работник на работното место се смета за напад врз службено лице, за што е предвидена и затворска казна“, велат оттаму. Обвинителството, барем засега, гони за „насилство“. Дали таа квалификација ќе остане до крајот, ќе покаже постапката. Комората, инаку, нема добиено никакво официјално известување за случајот – ни од докторот, ни од полицијата.

Насилството врз лекари, велат од струката, е честа појава, а најголемиот дел од случаите никогаш не стигнуваат до пријава. Овој стигна – со скршен пршлен како доказ. Сега ќе видиме дали системот умее барем еден ваков случај да го заврши докрај.