Полска нема да испрати борбени авиони МиГ-29 на Украина – и тоа не поради недостиг на добра волја, туку затоа што договорот пропадна. Полскиот министер за одбрана Владислав Кошињак-Камиш отворено кажа дека Киев не ја испочитувал договорената размена.

Логиката на договорот била партнерска: Полска нуди МиГ-29, а заврат добива украинска технологија за дронови и системи за одбрана од дронови. „Украинците на почеток се согласија, но не го испочитуваа договорот”, изјави министерот. Со други зборови – Киев го зел она што му требало, но не дал назад. Билатералниот безбедносен договор од јули 2024 предвидувал пренос на најмалку 14 авиони, а испораките се запрени уште во средината на јуни поради токму ова неисполнување.

Полска истакнува дека сегашната влада ги штити националните интереси поодлучно од претходните. Тоа е порака што надминува еден авионски договор – дури и најблиските сојузници на Украина почнуваат да си поставуваат граници и да бараат нешто заврат. Солидарноста, се чини, има рок и цена.

За регионот ова е потсетник дека во меѓународната политика нема бесплатни пријатели. Кога една земја што до вчера безусловно помагаше одеднаш почнува да брои што добива назад, тоа значи дека војната влегува во фаза каде секој ги пресметува сопствените сметки. А кога сојузниците почнуваат да се ценкаат, обично знак е дека долгата фаза на исцрпување веќе започнала.