Мечка нападна 41-годишен маж од селото Курбиново, ресенско, додека береше печурки. Се случи синоќа, околу 19:50 часот. Човекот итно беше пренесен во Клиничката болница во Битола, каде што му беше укажана лекарска помош. Полицијата го потврди инцидентот преку СВР Битола.

Уште една средба човек-мечка што заврши во болница. И повторно во истиот појас на југозапад, каде мечката одамна престана да биде реткост што ја гледаш еднаш во животот. Собирањето печурки во ова подрачје станува активност со ризик што никој официјално не го признава.

Мечката во Македонија е строго заштитен вид, што значи дека одговорноста за управување со популацијата и со конфликтите паѓа врз државата, не врз човекот што случајно ќе се најде на погрешно место во шумата. Но каде е таа држава кога ресенчанецот завршува на хируршка маса? Прашањето не е реторичко за оние што живеат под Пелистер и Галичица.

Секое лето сценариото се повторува по истиот терк: напад, болница, кратко соопштение, тишина до следниот пат. Нема мапа на ризични зони, нема предупредувања за берачите, нема систем што би ги известил луѓето кога и каде мечките се приближуваат до селата. А кога ќе се случи следниот напад, повторно ќе читаме за уште еден „инцидент“.

За човекот од Курбиново, засега, важна е само една бројка – дека преживеа и стигна до Битола. Останатото е работа на институциите што со години гледаат како проблемот расте, а реагираат само со соопштенија по фактот.