Управата за хидрометеоролошки работи најавува нов топлотен бран што ќе трае до крајот на следната седмица. Особено топло ќе биде од среда, кога наместа дневната температура ќе надмине 40 степени.

Вчера во 17 часот УХМР измери 37,2 степени во Велес и на Зајчев Рид во Скопје, 36,6 во Кавадарци, 36,2 во Скопје-Петровец, 35,8 во Демир Капија, Штип и Виница. Најладно беше на Попова Шапка со 21,6 степени. Тоа е разлика од речиси шеснаесет степени во една држава широка колку што е нашата.

Ноќта е поопасна од денот

Најголемиот здравствен ризик не доаѓа од самиот врв на дневната температура, туку од комбинацијата: високи дневни температури плус тропски ноќи во кои телото нема кога да се излади. Организмот не се опоравува, а следниот ден почнува со веќе потрошени резерви.

Најзагрозени се луѓето над 65 години, оние со хронични срцеви и белодробни заболувања, малите деца, бремените жени и работниците што работат надвор. Последната група е онаа што најмалку се спомнува во препораките, а има најмалку можност да ги следи.

Препораката „останете дома во најтоплиот дел од денот” е добронамерна и е точна. Само што не важи за човекот на скеле во два попладне.

УВ-зрачење и опасност од пожари

Нивоата на ултравиолетово зрачење остануваат многу високи, што го зголемува ризикот од оштетување на кожата дури и при кратко изложување. Истовремено, сувата состојба на теренот ја зголемува опасноста од пожари – нешто што овој месец веќе го видовме на повеќе локации низ државата.

Слични услови се прогнозираат низ целиот Балкан и во јужна Европа. Ова не е македонска аномалија, туку регионална слика на лето кое станува подолго и потешко за издржување со секоја година.

Планот за најтоплите денови треба да постои пред тие денови, а не во нив. Кои институции ги имаат подготвено климатизираните простории, распоредот на работното време и линиите за помош – и кога граѓаните ќе слушнат за нив?