Осумнаесетгодишен поранешен ученик влегол во средното училиште „Бринел” во Фагерста, северозападно од Стокхолм, со меч и со кацига на глава. Едно лице е убиено. Две тинејџерки се тешко повредени, а трето лице е пренесено во болница со непознати повреди.

Полицијата примила повик во 14:06 часот. „Го добивме повикот во 14:06 и ги испративме сите расположливи екипи до училиштето”, соопшти портпаролот на полицијата. Нападачот бил застрелан од полицијата и е во притвор.

Според шведската јавна телевизија, која се повикува на неименувани извори, уапсениот бил поранешен ученик на истото училиште и веќе имал претходна осуда за напад. Тоа значи дека системот го имал во своите евиденции. Го имал, го знаел и сепак тој влегол низ вратата на училиште со 450 ученици на возраст од шеснаесет до дваесет години.

Една година по Оребру

Ова се случува точно една година по пукањето во училиште во Оребру, во централна Шведска, каде што нападачот уби десет луѓе пред да се убие себеси. Тоа беше најсмртоносниот масовен напад во шведската историја.

„Сериозен инцидент се случи во Фагерста веднаш по почетокот на новата учебна година. Сѐ уште не знаеме што ја мотивирало оваа постапка, но знаеме дека полицијата интензивно работи на случајот”, соопшти шведскиот премиер Улф Кристерсон.

Формулацијата е стандардна. Ја слушаме секогаш, во секоја земја, по секој ваков ден. Она што ретко го слушаме е што конкретно се променило од претходниот пат.

Земјата што важеше за најбезбедна

Шведска со децении беше пример за сигурност и социјална стабилност – земјата што другите ја посочуваа кога сакаа да покажат како се прави тоа. Денес во таа земја училиштата и јавните објекти во еден град се затворени и евакуирани заради еден напад со меч.

Дали моделот попушти, или само престанавме да гледаме што се случува под површината? Нордиската слика на ред и мир е нешто што и на Балканот често ни ја продаваат како цел кон која треба да одиме. Вредно е да се праша кон која верзија на таа слика точно одиме.