Мнозинството граѓани на Германија би ја поддржале повторната воведба на задолжителната воена служба, покажува анкета на Институтот INSA спроведена за весникот „Билд“. Според резултатите, 58% од испитаниците сметаат дека задолжителната служба за мажи родени по 2008 година е правилниот чекор, 29% се против, а 13% се неопределени.

Овие резултати доаѓаат само неколку дена по компромисот во владината коалиција на канцеларот Фридрих Мерц, која претстави програма за зајакнување на Бундесверот преку нов модел на доброволна служба, но и можност за задолжително служење доколку бројот на доброволци биде недоволен.

Анкетата покажува скепса: 57% од граѓаните не веруваат дека ќе има доволно доброволци за да се постигнат целите на армијата, додека само 25% мислат дека тоа е возможно.

Иако мнозинството ја поддржува идејата за регрутација, личната подготвеност за служење останува ниска. Само 31% од испитаниците велат дека би се пријавиле доброволно, а дури 55% категорично го одбиваат тоа.

Истражувањето е спроведено на примерок од 1.003 лица помеѓу 13 и 14 ноември.

Германија ја суспендираше задолжителната воена служба во 2011 година, но може да ја врати со обично парламентарно мнозинство, особено во услови на геополитички тензии или вонредна состојба. Според Уставот, задолжителната служба важи само за мажи; проширување на обврската и за жени би барало уставни измени.