Владимир Путин нареди тридневна обустава на нападите врз Киев, со почеток од полноќ. Не врз Украина – врз Киев. Кремљ тоа го соопшти буквално откако американската делегација влезе во зградата.

Специјалниот пратеник на Доналд Трамп, Стив Виткоф, и неговиот зет Џаред Кушнер пристигнаа во Москва за разговори за завршување на војната. Попладнето беа во Кремљ. Портпаролот Дмитриј Песков потврди дека обуставата се однесува само на главниот град и дека е „поврзана со подготовката и одржувањето контакти на Американците во Киев“.

Со други зборови: небото над Киев е безбедно дотолку колку што во градот има Американци. Останатата Украина продолжува како и вчера.

Поздравот што кажува повеќе од договорот

Поздравувајќи ги гостите, Путин рече: „Ситуацијата што денес мораме да ја разгледаме, се разбира, не е едноставна. Но пред да почнеме, сакам да ве замолам да ги пренесете моите најдобри желби и зборови на благодарност до претседателот на Соединетите Држави, господинот Трамп.“

Тоа е човек што знае точно кому му зборува и преку кого. Најдобри желби пред почетокот на преговорите – тоа е протокол научен во КГБ, не во дипломатска академија.

Зеленски: спремни сме, но и ние имаме услов

Украинскиот претседател Володимир Зеленски изјави дека разговарал со Виткоф и Кушнер и дека Украина е спремна до понеделник да ги обустави нападите врз Москва – под услов Русите да го сторат истото за Киев. „Спремни сме за содржаен разговор“, додаде тој.

Претходно, пак, Зеленски пријави дека руски проектили погодиле два аеродрома во близина на Киев, меѓу нив и Бориспол, кој некогаш служеше за меѓународни летови. „Очигледно тие руски напади врз аеродромите се реакција на разговорите и подготовките поврзани со можноста американската страна да стигне во Украина со авион“, рече тој.

Од почетокот на војната странските државници во Киев патуваат со воз од Полска. Нападот врз пистите не е случајна цел – тоа е порака за тоа кој ги одредува правилата на пристап.

Кремљ веќе ги спушти очекувањата

Трамп во Белата куќа ги нарече Виткоф и Кушнер „одлични преговарачи“ и рече дека носат предлог за завршување на војната, со „добра можност дека ќе го оствариме тоа“. Кремљ беше многу поштедлив: „Вчера самиот Трамп рече дека не станува збор за нови идеи. Тоа беше изјава на американскиот претседател“, потсети Песков.

Рускиот заменик-министер за надворешни работи Сергеј Рјабков беше уште подиректен: американската администрација мора да ја земе предвид ситуацијата на теренот, каде состојбата се менува, но не во корист на Киев.

Тоа е преговарачка позиција изразена без ни едно дипломатско завиткување – ние добиваме, вие приспособете се.

Три дена мир како преговарачки жетон

Мисијата се одвива среде речиси непрекинати ракетни и дронски напади врз украинската престолнина, вклучувајќи и директен погодок во седиштето на украинската Безбедносна служба. Зеленски призна дека поради сериозен недостиг од проектили-пресретнувачи Украина останала ранлива на балистички напади.

Три дена без напади врз еден град не е примирје. Тоа е демонстрација дека огнот може да се исклучи и вклучи по желба – што е поголема моќ од самиот оган. Балканот ја препознава оваа логика: кога некој ти покажува дека може да те остави на мир, ти покажува дека одлуката е негова, а не твоја.