Дваесет и шестгодишник е убиен на неполни сто метри од полициска станица. Двајца луѓе на мотоцикл застанале пред излог на фирма во Чаир, пукале кон група од петмина млади и продолжиле натаму. Еден куршум го погодил А.М. (26). Лекарите во „Мајка Тереза“ не успеале да го спасат. И сега, ден подоцна, министерот за внатрешни работи излегува пред камери со реченица што кажува многу повеќе отколку што сака да кажува: еден од сторителите веќе издржува затворска казна.

Панче Тошковски тоа го изговори на телевизија, мирно, како констатација. Човек што државата веќе го затворила, се нашол на скопска улица со оружје во раката. „Дали било пуштено, ослободено или така натаму, сè уште е рано да навлегуваме во тие детали“, рече министерот. Раната фаза на истрагата е удобно место за криење, но прашањето не бара истрага – бара административен извештај. Кој потпишал, кога и по кој основ.

Тошковски и самиот го отвора тоа поле. Тој зборуваше за „проблемот со влијанието на пенитенцијарниот систем, односно со затворите и она што се случува во нив“, и посочи дека темата ја отворил неодамна на конференција со ОБСЕ и странски дипломати, меѓу кои и американската амбасадорка. Значи, за проблемот се разговара на конференции со амбасадори. На улицата „Војдан Чернодрински“, во меѓувреме, се пука.

Бројките наспроти чувството

Министерот отфрли споредби од социјалните мрежи со Дивиот Запад и тврди дека насилниот криминал драстично е намален во споредба со пред три години, „кога организирани криминални групи буквално хараа низ градот“. Ги наведе и резултатите: МВР и Јавното обвинителство расчистиле седум убиства од претходни години, шест сторени во Македонија и едно кај јужниот сосед.

Тоа се вистински бројки и не треба да се отфрлаат. Но статистиката за намален криминал и еден застрелан 26-годишник во сабота навечер не се спротивставени тврдења – тие едноставно мерат различни работи. Едното мери колку случаи се затворени. Другото мери колку сигурно се чувствува човек кога стои пред излог во својот кварт.

Според официјалниот полициски билтен, петмина скопјани стоеле на раскрсницата помеѓу улиците „Прохор Пчински“ и „Војдан Чернодрински“ кога пред нив застанал мотоцикл со две лица. Пукале, па избегале. Обвинителството издало наредба за обдукција, собрани се траги за вештачење.

Тошковски вели дека МВР има првични информации за сторителите и обезбедени докази, и дека мотивот засега не може да се соопшти – но дека, според првичните сознанија, не станува збор за пресметка меѓу организирани групи за превласт на теренот, туку за „некои други причини“.

Пораката од министерот беше упатена до „сите оние кои мислат дека се недопирливи“. Проблемот е што таа порака веќе била упатена, повеќепати, во изминатите две и пол години. Прашањето што останува отворено ноќва не е дали ќе бидат фатени сторителите – тоа обично се случува. Прашањето е како еден од нив воопшто се нашол надвор.