Дрон погоди воз на украинско-полската граница, на два километри од територијата на НАТО. Композицијата беше празна, локомотивата оштетена, жртви нема. Но приказната не е во штетата, туку во тоа кој беше на истата пруга само неколку часа претходно.

По истата линија, во друга композиција, се враќаа поранешниот британски премиер Борис Џонсон, британскиот официјалец Џонатан Пауел и група европски безбедносни советници. Се враќаа од конференција во Киев. Поранешниот директор на ЦИА Дејвид Петреус бил на станицата во Јагодин токму кога ударил дронот и го опиша нападот како ужасувачки, како дело на водач кој сака да ги тероризира украинските цивили.

Москва соопшти дека гаѓала железничка инфраструктура во западна Украина. Украинските железници кажуваат нешто поинакво – дека дронот можеби барал токму „дипломатски воз“. Помеѓу тие две верзии нема средина: или Русија случајно го погодила најчувствителниот воз на таа пруга во тој ден, или не било случајно.

Петнаесет минути

Толку време имале патниците од моментот кога била издадена наредбата за евакуација до моментот кога дронот удрил. Украинските железници објаснуваат дека дипломатската композиција тргнала порано од предвиденото, бидејќи распоредите се менуваат поради постојаната закана од руски напади. Поранешниот шведски премиер Карл Билт раскажа дека во неговиот воз им било кажано да се подготват за евакуација, а неколку минути подоцна дека сѐ е во ред. Тоа е сегашноста на едно патување со воз низ Европа во 2026 година.

Џонсон потоа напиша дека не знае каква извртена логика го навела Путин да разнесе локомотива што стои во место на полската граница и дека тоа е вид случаен и бесмислен напад што Украинците го трпат секој ден. Побара сојузниците итно да испратат системи за противвоздушна одбрана.

Украинскиот министер за надворешни работи Андриј Сибиха го спакува целото значење во една реченица: теророт на Путин чука директно на вратите на ЕУ и НАТО. Полскиот премиер Доналд Туск свика итен состанок и предупреди дека ескалацијата од руска страна станува реалност и сѐ повеќе се приближува кон границата.

Два километри

Тоа е растојанието помеѓу погодената локомотива и границата на Полска. Односно, помеѓу еден дрон и член на НАТО. Во последните месеци Русија сѐ почесто гаѓа украински возови, железнички депоа, бензински станици и гранични премини – претходно оваа недела двајца загинаа во руски напад на граничниот премин кон Молдавија.

Балканот знае како изгледа кога една граница станува линија преку која никој не сака да чекори прв, а сите тестираат до каде оди трпението на другата страна. Разликата е во тоа што овде секое такво тестирање се брои во минути и метри. Колку пати треба дрон да падне на два километри од територија на НАТО за тоа да престане да се нарекува инцидент?