Портпаролката на Белата куќа, Каролин Ливит, изјави дека САД ја запираат финансиската поддршка за украинските воени напори по одлуката на претседателот Доналд Трамп. Таа истакна дека Вашингтон нема намера бесконечно да го покрива трошокот за конфликтот, пренесуваат американските медиуми.

„Претседателот Трамп престана да ја финансира оваа војна, но САД продолжуваат да продаваат големи количини оружје на НАТО. Не можеме да го правиме ова засекогаш. Претседателот сака оваа војна да заврши“, изјави Ливит.

И покрај прекинот на директното финансирање, таа нагласи дека комуникацијата со Киев не е прекината. Делегации од тимот за национална безбедност на Трамп и претставници на Украина неодамна одржале „многу продуктивни разговори“ за можни чекори кон прекин на конфликтот.

Вашингтон последните недели повторува дека приоритет им е мирно решение, но воедно инсистира европските партнери да го преземат најголемиот дел од товарот во поддршката за Украина. Американската позиција останува дека НАТО-сојузниците треба значително да го зголемат својот удел во трошоците.